22.09.17 12:00

Kielsen ammaanermi qiugassamik qiuigami ikiorneqarpoq

Maaliap 9-nik ukiullip – aatani peqatigalugu–Naalakkersuisut siulittaasuat Kim Kielsen containerinut inississuiffissamik atoqqaarfissiuinermi ammaammat ikiorpaat

Nuummi containerinut inississuiffissaq nutaaq maanna pisortatigoortumik ammarneqarpoq. Sikuki Nuuk Harbourip aamma Royal Arctic Line-illu, Nuummi innuttaasut piumasut tamaasa pisortatigoortumik ammaanersiornissamut isiginnaariaqqullugit aggersarpai. Atoqqaarfissiornermilu Naalakkersuisut siulittaasuat Kim Kielsen ammaagami peqatigivai Maalia Skifte 9-nik ukiulik taassumalu aataava Gustav Skifte. 

Sikuki Nuuk Harbour A/S
NuupUmiarsualivia Kalaallit Nunaanni umiarsualiviit annersarivaat annertuumillu Kalaallit Nunaannut, nunaannit nunaanilu assartugassanik angallassinermi qitiulluinnartumik inissisimalluni. Ukiorpaalunnili kingullerni Nuummi umiarsualivik mikivallaalersimavoq, taamallu umiarsaliviup allilernissaa pisariaqartinneqalersimalluni.

Sikuki Nuuk Harbour A/S pilersinneqarpoq ulloq 23. december 2013, piareersaalluni suliat siviusujaamik pereersullu. Pilersinneqarporlu pisussaaffigilerlugit sanaartortitsinissaq, piginnittuunissaq, ingerlatsinissaq aammalu umiarsualiveqarfimmik inerisaanissaq, taamallu 1, juli 2016-imili ingerlatsisuulerpoq maannalu containerinut inississuiffissamik nutaamik peqalerluni, Royal Arctic Line-imut attartortinneqalersumik, tamannalu angusaavoq pingaaruteqarluinnartoq. 

Containerinik inississuiffittaaq Kalaallit Nunaannut, nunaanniillu assartuineq inuiaqatigiit pilersorneqarnerannut avammullu tunisassiornerannut pingaaruteqarluinnartuuvoq.

Royal Arctic Line maanna containerinut inississuiffissamik nutaaliaasumik assigiinngitsutigullu atoruminartumik peqalerpoq, ikorfartorsinnaalerumallugu siunnerfiusoq, tassalu Kalaallit Nunaata niueqatigiuminarnerulernissaaa. Taamallu maanna pisoqarneratigut containerinik inississuisarfissaq Kalaallit Nunaata tamakkiisup siunissami attavilersorneqarneranut pingaaruteqarluinnartumik inissisimalissaaq.

Saniatigullu umiarsualivik tamakkiisumik isigalugu inissaqarluarnerulerlunilu atoruminarnerulissaaq atuisunut annertuumik iluaqutaalersussamik, tassa containerinut inississuiffitoqqat siunertanut allanut atorneqarsinnaalernerisigut.

Containerinut inississuiffissaq:
Qaqqajunnaq 340.000 kbm-isut annertutigisoq Qeqertani suliarinnittumit entreprenør Per Aarsleff Grønland ApS-imit qaartiterneqarluni manissarneqarsimavoq aammalu immap ataani qaartiterisoqarsimalluni. Qeqertamilu avallermi naaralaartitsiveqarfiusumi  40.000 kvm-iusoq inississuiffissatut qaartiterlugu suliarineqarsimavoq.

  • Tulattarfissaq 310 meteriusoq 10,5 meterisut ititigisumik imartalik aammalu tulattarfissaq 50 meterisut takitigisoq 5,5 meterisut ititigisumik imartalik pilersinneqarput.
  • Poortugaleriffik, allaffiit sullivillu sananeqartut Sikukimit Royal Arctic Line-imut attartortinneqarput
  • Containerinut inississuiffissaq 47.320 m2-iusoq pilersinneqarpoq, taannalu maanna piusunit 50%-imik annertuneruvoq  
  • TEU-t 3.300-ut taakkulu saniasigut reefercontainerit 500-ut inissaqalerput
  • Kivittaassuillu marluk Liebherr LHM 420 mobile-it immikkut tamarmik annerpaamik 124 tonsinik kivitsisinnaasut 18 meterisullu annertussuseqartumik avammut anillassinnaasut ataatsimoortillugillu 200 tonsinik kivitsisinnaasut pigineqalerput
  • Inississuiffissarlu tassa aamma pigineqalerluni 

Terminal 089 20170922

Terminal 090 20170922

Terminal 091 20170922

Terminal 092 20170922